हिंगोलीत अमृत EDP प्रशिक्षणाचा चौथा दिवस संपन्न; डिजिटल मार्केटिंग व अमृतपेठ नोंदणीबाबत मार्गदर्शन

हिंगोली : महाराष्ट्र संशोधन, उन्नती व प्रशिक्षण प्रबोधिनी (अमृत), हिंगोली जिल्हा कार्यालयाच्या वतीने आयोजित अमृत उद्योग कौशल्य वर्धन प्रशिक्षण (EDP) बॅच क्रमांक २ च्या चौथ्या दिवशी डिजिटल मार्केटिंग आणि अमृतपेठ ऑनलाइन बाजारपेठेवरील नोंदणी या विषयांवर प्रशिक्षणार्थींना सविस्तर मार्गदर्शन करण्यात आले.

या प्रशिक्षण सत्रात अंकुश देशमाने सर यांनी डिजिटल मार्केटिंगचे महत्त्व विशद करताना आधुनिक तंत्रज्ञानाचा वापर करून व्यवसायाची जाहिरात कशी करावी, सोशल मीडियाच्या माध्यमातून ग्राहकांपर्यंत कसे पोहोचावे आणि ऑनलाइन माध्यमांचा प्रभावी वापर करून व्यवसायाची व्याप्ती कशी वाढवावी, याबाबत मार्गदर्शन केले.

आजच्या डिजिटल युगात व्यवसायाची वाढ करण्यासाठी ऑनलाइन जाहिरात, उत्पादनांची आकर्षक मांडणी, ग्राहकांशी संवाद आणि डिजिटल माध्यमांचा योग्य वापर करणे आवश्यक असल्याचे त्यांनी सांगितले. तसेच, ग्राहकांच्या गरजा ओळखून आपल्या उत्पादनांची माहिती प्रभावीपणे सादर करण्याचे महत्त्वही त्यांनी स्पष्ट केले.

अमृतपेठ ऑनलाइन बाजारपेठेवर नोंदणी कशी करावी, याबाबतही प्रशिक्षणार्थींना मार्गदर्शन करण्यात आले. अमृतपेठेच्या माध्यमातून उद्योजकांना आपल्या उत्पादनांची माहिती ऑनलाइन उपलब्ध करून देणे, उत्पादनांना व्यापक बाजारपेठ मिळवून देणे आणि संभाव्य ग्राहकांपर्यंत पोहोचण्याच्या संधी निर्माण करणे याविषयी माहिती देण्यात आली.

या प्रशिक्षणाचा मुख्य उद्देश लक्षित गटातील नवउद्योजकांना आधुनिक व्यावसायिक कौशल्यांची ओळख करून देणे, डिजिटल मार्केटिंगविषयी जागरूकता निर्माण करणे आणि त्यांच्या उत्पादनांना बाजारपेठ उपलब्ध करून देण्यासाठी सक्षम बनविणे हा होता. अमृतच्या उद्योग कौशल्य वर्धन प्रशिक्षणाच्या माध्यमातून प्रशिक्षणार्थींना व्यवसाय सुरू करणे, व्यवसायाचे नियोजन करणे, उत्पादनांचे मार्केटिंग करणे आणि उपलब्ध डिजिटल सुविधांचा लाभ घेणे यासंदर्भात मार्गदर्शन मिळत आहे. या प्रशिक्षणामुळे नवउद्योजकांना आत्मनिर्भर होण्यासाठी तसेच स्वतःच्या व्यवसायाची प्रगती साधण्यासाठी निश्चितच मदत होणार आहे.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत  अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/