हिंगोली येथे अमृत EDP प्रशिक्षणाच्या तिसऱ्या दिवशी आर्थिक नियोजन व उद्योजकता व्यवस्थापनावर मार्गदर्शन

हिंगोली : महाराष्ट्र संशोधन, उन्नती व प्रशिक्षण प्रबोधिनी (अमृत), हिंगोली जिल्हा कार्यालयाच्या वतीने आयोजित अमृत उद्योग कौशल्य वर्धन प्रशिक्षण (EDP) बॅच क्रमांक २ च्या तिसऱ्या दिवशी प्रशिक्षणार्थींना आर्थिक नियोजन, यशस्वी उद्योजकांची वैशिष्ट्ये, मनुष्यबळ नियोजन तसेच व्यवसायातील अडचणी आणि त्यावरील उपाययोजना या विषयांवर सविस्तर मार्गदर्शन करण्यात आले.

या प्रशिक्षण सत्रात विजयकुमार कांबळे सर यांनी उद्योजकतेमध्ये आर्थिक नियोजनाचे महत्त्व स्पष्ट केले. व्यवसाय सुरू करताना उपलब्ध भांडवलाचा योग्य वापर, उत्पन्न व खर्चाचे नियोजन, आर्थिक शिस्त आणि व्यवसायाच्या वाढीसाठी निधीचे व्यवस्थापन कसे करावे, याविषयी त्यांनी मार्गदर्शन केले. तसेच यशस्वी उद्योजक होण्यासाठी जिद्द, आत्मविश्वास, निर्णयक्षमता, सातत्य आणि सकारात्मक दृष्टिकोन आवश्यक असल्याचे त्यांनी सांगितले.

यावेळी व्यवसायाच्या गरजेनुसार योग्य मनुष्यबळाची निवड, कामांचे नियोजन, जबाबदाऱ्यांचे वाटप आणि उपलब्ध मनुष्यबळाचा प्रभावी वापर या बाबींवरही मार्गदर्शन करण्यात आले. व्यवसाय करताना उद्भवणाऱ्या आर्थिक, व्यवस्थापकीय आणि बाजारपेठेतील अडचणी ओळखून त्यावर योग्य उपाययोजना करणे, संभाव्य अडचणींचा पूर्वअंदाज घेणे आणि नियोजनबद्ध पद्धतीने व्यवसायाची वाटचाल करणे, याचे महत्त्व प्रशिक्षणार्थींना समजावून सांगण्यात आले.

प्रशिक्षणादरम्यान व्यवसायात केवळ भांडवल असणे पुरेसे नसून योग्य नियोजन, व्यवस्थापन, ग्राहकांशी चांगले संबंध आणि परिस्थितीनुसार निर्णय घेण्याची क्षमता असणे आवश्यक असल्याचे अधोरेखित करण्यात आले. या मार्गदर्शनामुळे प्रशिक्षणार्थींना स्वतःचा व्यवसाय सुरू करताना तसेच विद्यमान व्यवसायाची वाढ करताना आवश्यक असलेल्या विविध बाबींचे व्यावहारिक ज्ञान मिळाले.

स्वयंरोजगाराला चालना देणे, आर्थिक स्वावलंबन वाढविणे आणि लक्षित गटातील युवक-युवतींना सक्षम उद्योजक बनविणे, हा अमृत EDP प्रशिक्षण कार्यक्रमाचा प्रमुख उद्देश आहे. या प्रशिक्षणाच्या माध्यमातून प्रशिक्षणार्थींना उद्योग-व्यवसाय सुरू करण्यासाठी आवश्यक कौशल्ये, नियोजनाची दिशा आणि उद्योजकीय दृष्टिकोन विकसित करण्याची संधी उपलब्ध होत आहे.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत  अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/