हिंगोली येथे अमृत EDP प्रशिक्षणाच्या दुसऱ्या दिवशी ब्रँडिंग, मार्केटिंग व सोशल मीडिया मार्केटिंगचे धडे

हिंगोली, दि. १० ऑक्टोबर २०२६ :** महाराष्ट्र संशोधन, उन्नती व प्रशिक्षण प्रबोधिनी (अमृत), हिंगोली जिल्हा कार्यालयाच्या वतीने आयोजित *अमृत उद्योग कौशल्य वर्धन प्रशिक्षण (EDP) बॅच-२* च्या दुसऱ्या दिवशी प्रशिक्षणार्थींना ब्रँडिंग, मार्केटिंग व सोशल मीडिया मार्केटिंग या विषयांवर मार्गदर्शन करण्यात आले. या सत्रात मार्केटिंग विषयाचे तज्ज्ञ गजानन बांगर सर यांनी उपस्थित प्रशिक्षणार्थींना व्यवसायवृद्धीसाठी आधुनिक विपणन तंत्रांचा वापर करण्याबाबत सविस्तर माहिती दिली. या मार्गदर्शन सत्रामध्ये व्यवसायाची स्वतंत्र ओळख निर्माण करणे, उत्पादनांचे प्रभावी ब्रँडिंग करणे, योग्य बाजारपेठेची निवड करणे, ग्राहकांच्या गरजा समजून घेणे तसेच उत्पादनांची जाहिरात आणि विक्री वाढविण्यासाठी आवश्यक असलेल्या मार्केटिंगच्या विविध पद्धतींवर प्रकाश टाकण्यात आला. आजच्या डिजिटल युगात फेसबुक, इन्स्टाग्राम आणि व्हॉट्सॲप यांसारख्या सोशल मीडिया माध्यमांचा वापर करून कमी खर्चात अधिकाधिक ग्राहकांपर्यंत पोहोचता येते. या माध्यमांच्या मदतीने आपल्या उत्पादनांची माहिती, वैशिष्ट्ये आणि गुणवत्ता ग्राहकांपर्यंत प्रभावीपणे पोहोचवून व्यवसायाला नवी दिशा देता येते, याबाबत गजानन बांगर सर यांनी मार्गदर्शन केले. व्यवसायामध्ये केवळ दर्जेदार उत्पादन तयार करणे पुरेसे नसून, त्याची योग्य प्रसिद्धी, ग्राहकांशी प्रभावी संवाद, बाजारपेठेतील स्पर्धेचा अभ्यास आणि ग्राहकांचा विश्वास संपादन करणेही तितकेच महत्त्वाचे आहे, असे त्यांनी स्पष्ट केले. या सत्रातून प्रशिक्षणार्थींना आधुनिक मार्केटिंग तंत्रांचा वापर करून स्वतःच्या व्यवसायाची ओळख निर्माण करणे आणि व्यवसायवृद्धी साधणे याबाबत उपयुक्त माहिती मिळाली. **लक्षित गटातील युवक-युवतींना उद्योजकतेकडे वळविणे, त्यांच्यात व्यावसायिक कौशल्य विकसित करणे आणि स्वयंरोजगाराच्या माध्यमातून आर्थिक स्वावलंबन साधण्यासाठी प्रोत्साहित करणे**, हा अमृत उद्योग कौशल्य वर्धन प्रशिक्षणाचा प्रमुख उद्देश आहे. हिंगोली येथे आयोजित अमृत EDP प्रशिक्षण बॅच-२ हे ९ ते १८ ऑक्टोबर २०२६ या कालावधीत राबविण्यात येत असून, या प्रशिक्षणाच्या माध्यमातून इच्छुक प्रशिक्षणार्थींना व्यवसाय सुरू करण्यासाठी आणि यशस्वी उद्योजक बनण्यासाठी आवश्यक कौशल्ये व मार्गदर्शन उपलब्ध करून देण्यात येत आहे.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत अशा जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/