अमृतच्या लक्षित गटांसाठी ‘सेवा संकल्प’ अभियान; ७ गावांमध्ये मोफत डॉक्यूमेंट्स शिबिर

गोंदिया : AMRUTच्या माध्यमातून लक्षित गटातील नागरिकांना व्यवसायिक व उद्योजकीय वाटचालीसाठी आवश्यक कागदपत्रे उपलब्ध करून देण्याच्या उद्देशाने ‘सेवा संकल्प अभियान’ राबविण्यात येत आहे. या अभियानांतर्गत गोंदिया जिल्ह्यातील निवडक गावांमध्ये मोफत डॉक्यूमेंट्स शिबिरांचे आयोजन करण्यात येणार आहे. ग्रामीण भागातील पात्र नागरिकांना विविध योजना, प्रशिक्षण, स्वयंरोजगार व उद्योजकीय संधींचा लाभ घेण्यासाठी आवश्यक असलेली कागदपत्रे सहज उपलब्ध व्हावीत, हा या उपक्रमाचा प्रमुख उद्देश आहे. विशेषतः ओपन कॅटेगरीतील लक्षित गटातील नागरिकांना योजनांशी जोडून त्यांच्या व्यवसायिक व उद्योजकीय वाटचालीला चालना देण्यासाठी AMRUTच्या माध्यमातून हा उपक्रम राबविण्यात येत आहे. या उपक्रमांतर्गत अमृत दत्तक ग्राम म्हणून निवडलेल्या गावांमध्ये तसेच जिल्ह्यातील इतर ठिकाणी डॉक्यूमेंट्स शिबिरे घेण्यात येणार आहेत. गोंदिया तालुक्यात गोंदिया शहर, बनाथर, कोचेवाही, बिरसी, कामठा, अदासी टांडा, तसेच आमगाव व देवरी तालुक्यातील सुर्तोली आणि लोहारा या गावांचा उपक्रमात समावेश करण्यात आला आहे. शिबिरात मिळणार विविध प्रमाणपत्रांची सुविधा या मोफत डॉक्यूमेंट्स शिबिरामध्ये नागरिकांना आवश्यक कागदपत्रे व प्रमाणपत्रांसाठी मार्गदर्शन आणि प्रक्रिया करण्याची सुविधा उपलब्ध करून देण्यात येणार आहे. यामध्ये प्रामुख्याने: - आधार कार्ड - पॅन कार्ड - डोमेसाइल सर्टिफिकेट - इन्कम सर्टिफिकेट - EWS सर्टिफिकेट या कागदपत्रांसाठी नागरिकांना आवश्यक प्रक्रिया, अर्ज व मार्गदर्शन उपलब्ध करून देण्यात येणार आहे. AMRUTच्या माध्यमातून राबविण्यात येणाऱ्या या उपक्रमामुळे ग्रामीण भागातील पात्र नागरिकांना कागदपत्रांसाठी होणारी धावपळ कमी होण्यास मदत होणार असून, विविध शासकीय योजना, प्रशिक्षण व स्वयंरोजगाराच्या संधींपर्यंत पोहोचणे सुलभ होणार आहे. ‘लाभार्थी शोधा, योजना समजवा आणि लाभ मिळवून द्या’ या संकल्पनेतून राबविण्यात येणाऱ्या ‘सेवा संकल्प अभियानाचा’ उद्देश केवळ कागदपत्रे उपलब्ध करून देणे नसून, पात्र नागरिकांना योग्य संधींशी जोडून त्यांना व्यवसायिक व उद्योजकीयदृष्ट्या सक्षम करण्याचा आहे. ग्रामीण भागातील पात्र नागरिकांनी या मोफत डॉक्यूमेंट्स शिबिरांचा लाभ घ्यावा आणि AMRUTच्या माध्यमातून उपलब्ध असलेल्या प्रशिक्षण, स्वयंरोजगार व उद्योजकीय संधींची माहिती घ्यावी, असे आवाहन करण्यात आले आहे.