सोलापूर येथे 'अमृत' संस्थेतर्फे मेहंदी प्रशिक्षण वर्गाचा उत्साहपूर्ण प्रारंभ

सोलापूर:

महाराष्ट्र संशोधन, उन्नती व प्रशिक्षण प्रबोधिनी (अमृत) संस्थेच्या माध्यमातून सोलापूर येथे महिलांसाठी आयोजित करण्यात आलेल्या विशेष मेहंदी प्रशिक्षण वर्गाचे उद्घाटन २९ सप्टेंबर रोजी अत्यंत उत्साहात पार पडले. या प्रशिक्षण वर्गाला पहिल्याच दिवशी सोलापूर शहरातील महिलांचा उत्स्फूर्त प्रतिसाद मिळाला.

या प्रशिक्षणाच्या माध्यमातून महिलांना रोजगाराची व स्वयंरोजगाराची नवीन संधी उपलब्ध करून दिली जात आहे. प्रशिक्षक मीनल ताई कुलकर्णी या महिलांना मेहंदीचे विविध प्रकार आणि बारकावे शिकवणार आहेत. कार्यक्रमाच्या सुरुवातीला सोलापूर जिल्हा कार्यालयातील ‘अमृत सखी’ आर्या कुलकर्णी यांच्या हस्ते मीनल ताई कुलकर्णी यांचे पुष्पगुच्छ देऊन सहर्ष स्वागत करण्यात आले.

उद्घाटन प्रसंगी १० ते १५ महिला उपस्थित होत्या. महिलांमधील सुप्त गुणांना वाव देऊन त्यांना आर्थिकदृष्ट्या सक्षम करणे हा या उपक्रमाचा मुख्य उद्देश आहे. पहिल्याच दिवशी उपस्थित महिलांमध्ये मोठा उत्साह पाहायला मिळाला.

प्रशिक्षण वर्गाची वेळ:

हे मेहंदी प्रशिक्षण दररोज संध्याकाळी ६:०० ते ७:०० या वेळेत चालणार आहे. महिला स्वावलंबनाच्या दिशेने 'अमृत' संस्थेने उचललेले हे पाऊल कौतुकास्पद असून, परिसरातील महिलांनी या प्रशिक्षणाचा लाभ घ्यावा, असे आवाहन आयोजकांतर्फे करण्यात आले आहे. १०८ A, श्री साई बिल्डिंग, तिसरा मजला, यतीराज हॉटेलच्या पुढे, सात रस्ता, मोदीखाना, सोलापूर - ४१३००१.

संपर्क क्रमांक: ९११२२२८७६८

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत  अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/