दोन दिवसीय अमृत पेठ प्रदर्शनाला अकोलेकरांचा उत्स्फूर्त प्रतिसाद.

अकोला, दि. २७ सप्टेंबर २०२६ :

महाराष्ट्र शासनाच्या महाराष्ट्र संशोधन, उन्नती व प्रशिक्षण प्रबोधिनी (अमृत) यांच्या वतीने अकोला येथील गायत्री नगर, गायत्री मंदिर, हिंगणा रोड, कौलखेड, अकोला येथे दिनांक २६ व २७ सप्टेंबर २०२६ रोजी दोन दिवसीय भव्य प्रदर्शनाचे आयोजन करण्यात आले होते. सकाळी १० ते रात्री १० वाजेपर्यंत सुरू असलेल्या या प्रदर्शनाला अकोलेकर नागरिकांनी भरभरून प्रतिसाद देत मोठ्या संख्येने उपस्थिती लावली.

या प्रदर्शनामध्ये विविध उपक्रम, उत्पादने, कलाकुसर, स्वयंरोजगाराशी संबंधित माहिती तसेच अमृतच्या लाभार्थी व उद्योजकांच्या कार्याची आकर्षक मांडणी करण्यात आली होती. प्रदर्शनाच्या माध्यमातून नागरिकांना अमृतच्या विविध योजना, प्रशिक्षण उपक्रम, कौशल्य विकास, स्वयंरोजगाराच्या संधी आणि शासनाच्या विविध योजनांची माहिती देण्यात आली.

दोन दिवसांच्या कालावधीत विद्यार्थी, महिला, युवक, उद्योजक तसेच विविध क्षेत्रातील नागरिकांनी प्रदर्शनाला भेट देऊन विविध दालनांची पाहणी केली. विशेषतः स्थानिक पातळीवर तयार करण्यात येणाऱ्या वस्तू व उत्पादनांना नागरिकांकडून उत्स्फूर्त प्रतिसाद मिळाला.

अमृतच्या माध्यमातून पात्र लाभार्थींना विविध शासकीय योजना, प्रशिक्षण, कौशल्य विकास आणि स्वयंरोजगाराच्या संधी उपलब्ध करून देण्याचे कार्य सातत्याने सुरू आहे. या प्रदर्शनामुळे लाभार्थी व उद्योजकांना आपल्या उत्पादनांचे सादरीकरण करण्यासाठी तसेच नागरिकांपर्यंत आपल्या कार्याची माहिती पोहोचविण्यासाठी प्रभावी व्यासपीठ उपलब्ध झाले.

गायत्री नगर, गायत्री मंदिर, हिंगणा रोड, कौलखेड येथील या दोन दिवसीय अमृत पेठ प्रदर्शनाला मिळालेला उत्स्फूर्त प्रतिसाद हा अमृतच्या उपक्रमांबद्दल नागरिकांमध्ये वाढत असलेली जागरूकता आणि जनसहभागाचे प्रतीक ठरला.

प्रदर्शनाच्या यशस्वी आयोजनासाठी अमृतच्या अधिकारी व कर्मचारीवर्गाने विशेष परिश्रम घेतले.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत  अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/