विश्वबंधुत्व दिनानिमित्त विद्यार्थ्यांना व्यसनमुक्ती व राष्ट्रीय कर्तव्याचे मार्गदर्शन

कासारी : विश्वबंधुत्व दिनानिमित्त कासारी येथील हिराबाई गोपाळ गायकवाड माध्यमिक हायस्कूल येथे विद्यार्थ्यांसाठी मार्गदर्शनपर कार्यक्रमाचे आयोजन करण्यात आले. यावेळी अध्यात्मिक आघाडीचे जिल्हाध्यक्ष ह. भ. प. पंढरीनाथ बबन गायकवाड यांनी विद्यार्थ्यांशी संवाद साधून व्यसनमुक्त महाराष्ट्र, राष्ट्रीय कर्तव्य तसेच महापुरुषांच्या विचारांचे महत्त्व याबाबत मार्गदर्शन केले.

मार्गदर्शन करताना त्यांनी महात्मा ज्योतिबा फुले, क्रांतिज्योती सावित्रीबाई फुले, महर्षी धोंडो केशव कर्वे आणि आनंदीबाई जोशी यांच्या कार्याची माहिती विद्यार्थ्यांना दिली.

शिक्षण, स्त्री शिक्षण, सामाजिक सुधारणा आणि समाजाच्या उन्नतीसाठी या महान व्यक्तींनी केलेल्या कार्यातून विद्यार्थ्यांनी प्रेरणा घ्यावी, असे आवाहन त्यांनी केले. तसेच व्यसनांपासून दूर राहून निरोगी जीवन जगावे आणि देशाच्या विकासासाठी आपले राष्ट्रीय कर्तव्य प्रामाणिकपणे पार पाडावे, असेही त्यांनी सांगितले.

या कार्यक्रमास विद्यार्थ्यांचा उत्स्फूर्त प्रतिसाद मिळाला. कार्यक्रमाच्या यशस्वी आयोजनासाठी शाळेच्या मुख्याध्यापिका सौ. ज्योत्स्नाताई दरेकर यांनी अनमोल सहकार्य केले. त्यांच्या या सहकार्याबद्दल अमृत संस्थेच्या वतीने कमलाकर कुलकर्णी यांनी आभार व्यक्त केले. या मार्गदर्शनामुळे विद्यार्थ्यांमध्ये व्यसनमुक्ती, सामाजिक बांधिलकी, राष्ट्रप्रेम आणि महापुरुषांच्या विचारांविषयी सकारात्मक संदेश निर्माण झाला.