लोहारा (जि.धाराशिव) येथे ब्राह्मण समाजातील महिलांची कॉर्नर बैठक उत्साहात; फॅशन डिझाईन प्रशिक्षणासाठी नोंदणी व कागदपत्रे संकलन

लोहारा : अमृत (महाराष्ट्र संशोधन, उन्नती व प्रशिक्षण प्रबोधिनी), महाराष्ट्र शासन स्वायत्त संस्था आणि ज्ञानदा सुशिक्षित बेरोजगार बहुउद्देशीय सामाजिक संस्था, धाराशिव यांच्या संयुक्त विद्यमाने लोहारा येथे ब्राह्मण समाजातील महिलांसाठी कॉर्नर बैठक आयोजित करण्यात आली.

या बैठकीत महिलांना कौशल्याधारित प्रशिक्षणाच्या माध्यमातून स्वावलंबी व आर्थिकदृष्ट्या सक्षम करण्याच्या उद्देशाने फॅशन डिझाईन प्रशिक्षण कोर्ससाठी नोंदणी प्रक्रिया राबविण्यात आली. यावेळी इच्छुक महिलांची नोंदणी करून घेण्यात आली तसेच प्रशिक्षणासाठी आवश्यक कागदपत्रे जमा करण्यात आली.

महिलांना त्यांच्या आवडी, कौशल्य आणि क्षमतेनुसार रोजगार व स्वयंरोजगाराच्या संधी उपलब्ध करून देण्यासाठी अमृत आणि ज्ञानदा संस्थेच्या माध्यमातून विविध कौशल्यविकास प्रशिक्षण उपक्रम राबविण्यात येत आहेत. फॅशन डिझाईनसारख्या व्यावसायिक प्रशिक्षणामुळे महिलांना घरबसल्या व्यवसाय सुरू करण्याबरोबरच बुटीक, कपड्यांचे डिझाईन, शिवणकाम व फॅशन क्षेत्रात रोजगाराच्या विविध संधी उपलब्ध होऊ शकतात. या पार्श्वभूमीवर आयोजित करण्यात आलेल्या कॉर्नर बैठकीला महिलांचा उत्स्फूर्त प्रतिसाद मिळाला.

बैठकीदरम्यान महिलांशी संवाद साधून फॅशन डिझाईन प्रशिक्षणाचे स्वरूप, प्रशिक्षणातून मिळणारे कौशल्य, रोजगार व स्वयंरोजगाराच्या उपलब्ध संधी तसेच प्रशिक्षणानंतर स्वतःचा व्यवसाय उभारण्याच्या शक्यता याबाबत मार्गदर्शन करण्यात आले. इच्छुक महिलांकडून आवश्यक माहिती घेऊन त्यांची नोंदणी पूर्ण करण्यात आली आणि संबंधित कागदपत्रांचे संकलन करण्यात आले.

या कार्यक्रमादरम्यान श्रीमंत थोरले बाजीराव पेशवे जयंती देखील उत्साहात साजरी करण्यात आली. उपस्थित मान्यवर व महिलांनी श्रीमंत थोरले बाजीराव पेशवे यांच्या प्रतिमेस अभिवादन करून त्यांच्या शौर्य, पराक्रम आणि राष्ट्रनिष्ठेला उजाळा दिला.

छत्रपती शिवाजी महाराजांनी उभारलेल्या हिंदवी स्वराज्याच्या संकल्पनेला पुढे नेत मराठा सामर्थ्याचा विस्तार करण्यामध्ये श्रीमंत थोरले बाजीराव पेशवे यांचे योगदान अत्यंत महत्त्वाचे होते. त्यांच्या धाडसी मोहिमा, उत्कृष्ट युद्धनीती, नेतृत्वगुण आणि दूरदृष्टी यामुळे मराठ्यांचा प्रभाव दख्खनच्या पलीकडे उत्तर हिंदुस्थानापर्यंत पोहोचला. त्यांच्या पराक्रमातून आजच्या युवा पिढीने प्रेरणा घेऊन आत्मविश्वास, धैर्य आणि नेतृत्वगुण आत्मसात करावेत, असे यावेळी उपस्थितांनी सांगितले.

अमृतच्या माध्यमातून महिलांना विविध व्यावसायिक व कौशल्याधारित प्रशिक्षणाच्या संधी उपलब्ध करून देण्याचा प्रयत्न सुरू आहे. प्रशिक्षणाच्या माध्यमातून महिलांनी केवळ कौशल्य आत्मसात न करता त्या कौशल्याचा उपयोग करून स्वतःचा व्यवसाय उभारावा आणि आर्थिकदृष्ट्या सक्षम व्हावे, हा या उपक्रमामागील प्रमुख उद्देश आहे.

यावेळी अमृत स्वायत्त संस्थेचे जिल्हा व्यवस्थापक श्री. चिन्मय कुलकर्णी, जिल्हा उपव्यवस्थापक श्री. अजय कुलकर्णी, ज्ञानदा संस्थेचे अध्यक्ष श्री. शिवराज आचार्य, सौ. सगुणा आचार्य तसेच फॅशन डिझाईन प्रशिक्षणासाठी नोंदणी केलेल्या महिला व प्रशिक्षणार्थी मोठ्या संख्येने उपस्थित होत्या.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/