लोकशाहीर अण्णा भाऊ साठे यांना हिंगोली जिल्हा अमृततर्फे अभिवादन

हिंगोली, दि. १ ऑगस्ट : लोकशाहीर, साहित्यरत्न, समाजसुधारक आणि जनतेच्या दुःखाला आपल्या साहित्य व शाहिरीतून प्रभावीपणे आवाज देणारे लोकशाहीर अण्णा भाऊ साठे यांच्या जयंतीनिमित्त महाराष्ट्र संशोधन, उन्नती व प्रशिक्षण प्रबोधिनी (अमृत), जिल्हा कार्यालय हिंगोली येथे त्यांना भावपूर्ण अभिवादन करण्यात आले.

यावेळी लोकशाहीर अण्णा भाऊ साठे यांच्या प्रतिमेस पुष्पहार अर्पण करून त्यांच्या कार्याला विनम्र अभिवादन करण्यात आले. त्यांच्या साहित्याने समाजातील उपेक्षित, वंचित, कष्टकरी आणि शोषित घटकांच्या जीवनसंघर्षाला शब्द दिले. समता, सामाजिक न्याय, बंधुता आणि मानवी मूल्यांचा संदेश त्यांच्या साहित्यामधून आजही समाजाला प्रेरणा देत आहे, असे यावेळी उपस्थितांनी नमूद केले.

अमृतच्या विविध कौशल्य विकास, उद्योजकता विकास आणि समाजाभिमुख उपक्रमांद्वारे सामाजिक समता व सर्वसमावेशक विकासाची प्रेरणा घेऊन कार्य करण्याचा संकल्प यावेळी करण्यात आला.

या प्रसंगी जिल्हा व्यवस्थापक श्रीकांत धोतरे, तसेच अमृत कार्यालयातील अधिकारी व कर्मचारी उपस्थित होते. उपस्थितांनी लोकशाहीर अण्णा भाऊ साठे यांच्या कार्याचा आदर्श समाजाच्या सर्वांगीण विकासासाठी प्रेरणादायी असल्याचे सांगून त्यांच्या स्मृतींना विनम्र अभिवादन केले.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/