करंजावणे येथील इंगळे नगर येथे जिल्हा परिषद शाळेत अमृतवर्ग उत्साहात संपन्न

शिरूर तालुक्यातील करंजावणे येथील इंगळे नगर जिल्हा परिषद प्राथमिक शाळेच्या विद्यार्थ्यांचा अमृतवर्ग घेण्यात आला. आजच्या स्पर्धात्मक आणि तंत्रज्ञानप्रधान युगात लहान मुलांच्या सर्वांगीण विकासासाठी केवळ शालेय शिक्षण पुरेसे नसून चांगले संस्कार, नैतिक मूल्ये आणि व्यक्तिमत्त्व विकासही तितकाच महत्त्वाचा आहे. या पार्श्वभूमीवर आयोजित करण्यात येणारा 'अमृतवर्ग' लहान मुलांसाठी अत्यंत उपयुक्त ठरत असल्याचे पालक आणि शिक्षकांचे मत आहे. अमृत वर्गामध्ये मुलांना नैतिक मूल्ये, चांगल्या सवयी, शिस्त, प्रार्थना, देशभक्ती, पर्यावरण संवर्धन, वाचनाची आवड, संवाद कौशल्य तसेच विविध सांस्कृतिक आणि सर्जनशील उपक्रमांद्वारे जीवनोपयोगी शिक्षण दिले जाते. खेळ, कथा, गीते, समूहचर्चा आणि प्रेरणादायी उपक्रमांमुळे मुलांचा आत्मविश्वास वाढण्यास मदत होते. या वर्गामुळे मुलांमध्ये वेळेचे नियोजन, सहकार्याची भावना, जबाबदारीची जाणीव आणि समाजाप्रती सकारात्मक दृष्टिकोन निर्माण होत असल्याचेही दिसून येते. मोबाईल आणि दूरदर्शनवरील वाढत्या अवलंबित्वापासून मुलांना दूर ठेवून त्यांच्या बौद्धिक, मानसिक आणि भावनिक विकासासाठी अमृतवर्ग प्रभावी ठरत आहे. पालकांनीही अशा उपक्रमांना सकारात्मक प्रतिसाद दिला असून आपल्या मुलांना नियमितपणे अमृत वर्गात सहभागी करून घेण्याचे आवाहन आयोजकांनी केले आहे. लहान वयात चांगले संस्कार आणि योग्य मार्गदर्शन मिळाल्यास भावी पिढी सक्षम, सुसंस्कृत आणि जबाबदार नागरिक म्हणून घडण्यास निश्चितच मदत होईल, असा विश्वास व्यक्त केला जात आहे.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/