अमृतच्या माध्यमातून माहेश्वरी समाजाला शासकीय योजनांचे मार्गदर्शन

पुलगाव: समाजातील आर्थिकदृष्ट्या दुर्बल घटकांपर्यंत शासनाच्या विविध लोककल्याणकारी योजनांची माहिती पोहोचविणे आणि पात्र लाभार्थ्यांना त्या योजनांचा प्रत्यक्ष लाभ मिळवून देणे या उद्देशाने 'अमृत'च्या माध्यमातून पुलगाव येथे माहेश्वरी समाजाची माहितीपर बैठक आयोजित करण्यात आली.

या बैठकीस माहेश्वरी समाज, पुलगाव शहरचे अध्यक्ष श्री. श्याम टावरी, श्री. किशोर लोहिया तसेच समाजातील ज्येष्ठ नागरिक, व्यापारी, युवक आणि अन्य समाजबांधवांची उल्लेखनीय उपस्थिती लाभली.

बैठकीदरम्यान विद्यार्थ्यांसाठी शिष्यवृत्ती योजना, युवकांसाठी कौशल्य विकास व रोजगाराभिमुख प्रशिक्षण, स्वयंरोजगाराच्या संधी, महिला सक्षमीकरण योजना, व्यवसाय मार्गदर्शन तसेच केंद्र व राज्य शासनाच्या विविध योजनांची सविस्तर माहिती देण्यात आली. योजनांचा लाभ घेण्यासाठी आवश्यक कागदपत्रे, अर्ज प्रक्रिया आणि पात्रतेबाबतही मार्गदर्शन करण्यात आले.

उपस्थित सदस्यांनी विविध योजनांबाबत प्रश्न उपस्थित करून आपल्या शंकांचे निरसन करून घेतले. शासनाच्या योजनांची अचूक माहिती समाजातील प्रत्येक कुटुंबापर्यंत पोहोचणे आवश्यक असल्याचे मत यावेळी व्यक्त करण्यात आले.

बैठकीत झालेल्या चर्चेदरम्यान संपूर्ण माहेश्वरी समाजासाठी लवकरच मोठ्या प्रमाणावर विशेष मार्गदर्शन व जनजागृती बैठक आयोजित करण्याचा निर्णय घेण्यात आला. समाजातील प्रत्येक पात्र व्यक्तीपर्यंत योजनांची माहिती पोहोचविण्यासाठी सर्वांनी एकत्रितपणे कार्य करण्याची तयारी दर्शविली.

बैठकीच्या शेवटी उपस्थितांनी अमृतच्या माध्यमातून राबविण्यात येणाऱ्या समाजोपयोगी उपक्रमांचे स्वागत करत भविष्यातही अशाच माहितीपर बैठका सातत्याने आयोजित करण्याची अपेक्षा व्यक्त केली.

अमृत संस्थेविषयी :- महाराष्ट्र संशोधन, उन्नती व प्रशिक्षण प्रबोधिनी (अमृत) ही महाराष्ट्र शासनाची स्वायत्त संस्था असून, खुल्या प्रवर्गातील ज्या जातींना कोणत्याही शासकीय संस्था किंवा महामंडळाचा लाभ मिळत नाही, अशा जातींमधील आर्थिकदृष्ट्या दुर्बल घटकांसाठी विविध शासकीय योजनांचे प्रभावीपणे मार्गदर्शन व अंमलबजावणी करण्याचे कार्य संस्था करते. सद्यस्थितीत ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी आणि भूमिहार अशा २५ जातींचा संस्थेच्या लक्ष्यित गटामध्ये समावेश आहे. या जातींमधील वार्षिक उत्पन्न ₹८ लाखांपेक्षा कमी असलेले नागरिक अमृतच्या विविध योजनांचा लाभ घेऊ शकतात. राज्यातील सर्व ३६ जिल्ह्यांमध्ये अमृतची जिल्हा कार्यालये कार्यरत असून, अधिक माहितीसाठी आपल्या जिल्ह्यातील अमृत कार्यालयाशी संपर्क साधावा. अधिक माहितीसाठी संपर्क : ऋषिकेश खराटे (जिल्हा व्यवस्थापक, वर्धा) – ९११२२२७६३२ पत्ता : महाराष्ट्र संशोधन, उन्नती व प्रशिक्षण प्रबोधिनी (अमृत) प्रशासकीय भवन, तळमजला, जिल्हाधिकारी कार्यालय परिसर, सिव्हिल लाईन, वर्धा – ४४२००१ संकेतस्थळ : https://mahaamrut.org.in/