नगरसेविका साधना मटाले यांच्या हस्ते नाशिकच्या अमृतपेठ थेट बाजारपेठेचे उद्घाटन

नाशिक : अमृत या राज्य शासनाच्या स्वायत्त संस्थेतर्फे नाशिकमध्ये आयोजित करण्यात आलेल्या अमृतपेठ थेट बाजारपेठ उपक्रमाला चांगला प्रतिसाद मिळाला होता. त्या पार्श्वभूमीवर, आजपासून (११ एप्रिल) पुन्हा एकदा दोन दिवसांच्या अमृतपेठ थेट बाजारपेठेचे नशिकमध्ये आयोजन करण्यात आले आहे. स्वातंत्र्यवीर विनायक दामोदर सावरकर सभागृहात प्रभाग २५च्या नगरसेविका साधना मटाले यांच्या हस्ते या उपक्रमाचे उद्घाटन मोठ्या उत्साहात झाले. स्थानिक लघुउद्योजकांना बाजारपेठ उपलब्ध करून देणे व ग्राहकांना थेट उत्पादकांकडून दर्जेदार स्थानिक उत्पादनांच्या खरेदीची संधी उपलब्ध करून देणे हा या उपक्रमामागचा मुख्य उद्देश असल्याने अधिकाधिक नागरिकांनी इथे भेट द्यावी व स्टॉलधारकांच्या लघुउद्योगांना चालना देऊन व्यावसायिकांना प्रोत्साहित करावे असे आवाहन मटाले यांनी केले.  

या दोन दिवसांच्या प्रदर्शनात एकूण ३५ स्टॉल धारकांनी सहभाग घेतला असून विविध प्रकारचे ड्रेस मटेरिअल, लेगिन्स, कुर्तीज, साडी कलेक्शन, पर्स, कॉस्मेटिक, हेअर आर्टस्, कोकण फूड्स, बेडशीट, टॉवेल, पापड, लोणची, चटण्या, मसाले, बेकरी प्रॉडक्ट, आयुर्वेदिक प्रॉडक्ट, रेडिमिक्स पदार्थ, विविध प्रकारची ज्वेलरी, घर सजावटीच्या वस्तू, रांगोळी, मध व त्याचे प्रकार, पूजासाहित्य, खवय्यांसाठी विविध पदार्थांचे लाइव्ह फूड स्टॉल यांचा समावेश असेल. दर दिवशी लकी ड्रॉ काढून तीन विजेत्यांची निवड केली जाणार आहे आणि त्यांना आकर्षक भेटवस्तू देण्यात येणार आहे. ग्राहकांना दर्जेदार व ताज्या वस्तू वाजवी दरात थेट उत्पादकांकडून घेण्याची संधी मिळणार असून, उत्पादकांना त्यांच्या मेहनतीचा आणि उत्पादनांचा योग्य मोबदला मिळणार आहे. ग्राहकांना त्यांच्या आवडीनुसार खरेदीचा मुक्तपणे आनंद मिळेल. खवय्यांना फूड स्टॉलच्या माध्यमातून स्वादिष्ट व चवदार पदार्थांचा आस्वाद घेता येणार आहे.

अमृतपेठ थेट बाजारपेठ हा उपक्रम अर्थव्यवस्थेला चालना देणारा ठरत असून, स्थानिक उत्पादनांना प्रोत्साहन देण्याच्या दृष्टीने महत्त्वपूर्ण भूमिका बजावणारा आहे. या उपक्रमाला नागरिकांनी मोठ्या संख्येने उपस्थित राहून प्रतिसाद द्यावा, असे आवाहन आयोजकांनी केले आहे.

महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था खुल्या प्रवर्गातील आर्थिक दुर्बल घटकांच्या सर्वांगीण सक्षमीकरणासाठी विविध उपक्रम राबवते. त्यात उद्योजकतेला साह्य करण्यासाठी अमृतपेठ हा महत्त्वाकांक्षी उपक्रम राबवला जातो. या उपक्रमामुळे, महिला बचत गट, लघुउद्योजक, तसेच अमृत संस्थेच्या लक्ष्यित गटातील लाभार्थी व स्वयंरोजगार करणाऱ्या लघुउद्योजकांना त्यांच्या उत्पादनांची थेट विक्री करण्यासाठी प्रभावी व्यासपीठ उपलब्ध होते. राज्याच्या अनेक भागांमध्ये या उपक्रमाला चांगला प्रतिसाद मिळाला आहे.

अमृतपेठ थेट बाजारपेठ - नाशिक 

दिनांक : ११ व १२ एप्रिल २०२६

वेळ : सकाळी ९ ते रात्री ९ वाजेपर्यंत

स्थळ : स्वातंत्र्यवीर विनायक दामोदर सावरकर हॉल (क्रॉम्टन हॉल) सावता नगर, सिडको, नाशिक.

अधिक माहितीसाठी संपर्क : 

निखिल जोशी : 9850208777

संजय गोसावी : 8857073911 

मयूर हातवळणे : 8830046256