भगवान परशुराम परिक्रमेचे हिंगोलीमध्ये जल्लोषात स्वागत

हिंगोली : अहिल्यानगर येथून प्रारंभ होऊन मध्य प्रदेशातील जानापावपर्यंत जाणाऱ्या भगवान परशुराम परिक्रमेचे हिंगोली जिल्ह्यात उत्साहात आगमन झाले. महाराष्ट्र संशोधन, उन्नती व प्रशिक्षण प्रबोधिनी अर्थात अमृत या राज्य शासनाच्या स्वायत्त संस्थेच्या हिंगोली कार्यालयातर्फे या परिक्रमेचे स्वागत करण्यात आले. ब्रह्मवृंदाच्या उपस्थितीत कार्यक्रमाची सुरुवात भक्तिमय वातावरणात झाली.

अहिल्यानगर येथील श्री चिरंजीव प्रतिष्ठान, तसेच महाराष्ट्र व मध्य प्रदेशातील विविध ब्राह्मण समाज संघटनांच्या संयुक्त विद्यमाने या परिक्रमेचे आयोजन करण्यात आले आहे. ब्राह्मण समाजासह खुल्या प्रवर्गातील, ज्यांना इतर कोणत्याही शासकीय योजनांचा लाभ मिळत नाही, अशा घटकांसाठी राज्य शासनाची स्वायत्त संस्था म्हणून अमृत कार्यरत आहे. या संस्थेमार्फत विविध विकासात्मक उपक्रम प्रभावीपणे राबवले जात आहेत.

परिक्रमेच्या स्वागतप्रसंगी अमृत संस्थेचे हिंगोली जिल्हा उपव्यवस्थापक संजय मेथेकर यांच्या हस्ते भगवान परशुराम यांच्या प्रतिमेचे विधिवत पूजन करण्यात आले. उपस्थितांनीही मोठ्या श्रद्धेने पूजनात सहभाग घेतला. कार्यक्रमाला विविध संघटनांचे पदाधिकारी व ब्रह्मवृंद मोठ्या संख्येने उपस्थित होते.

अमृत संस्थेच्या वतीने जिल्हा व्यवस्थापक श्रीकांत धोतरे, उपव्यवस्थापक संजय मेथेकर, तसेच लक्ष्यित गटातील विविध संघटनांच्या अध्यक्षांनी परिक्रमा मंडळाचे स्वागत केले. या वेळी विद्यार्थी व महिला यांनीही उत्स्फूर्तपणे सहभाग घेतला होता.