महिलांच्या आर्थिक स्वावलंबनासाठी अमृत क्लाउड किचन योजनेचे मार्गदर्शन

छत्रपती संभाजीनगर येथे अमृत क्लाउड किचन योजनेसंदर्भात महिलांची बैठक उत्साहात पार पडली. ही बैठक अमृत सखी सौ. मंजू कुलकर्णी यांनी घेतली. या बैठकीत महिलांना महाराष्ट्र संशोधन, उन्नती व प्रशिक्षण प्रबोधिनी (अमृत) यांच्या विविध योजना, उपक्रम आणि स्वयंरोजगाराच्या संधींबाबत सविस्तर माहिती देण्यात आली. अमृत संस्थेमार्फत उद्योजकता, कौशल्य विकास आणि आर्थिक स्वावलंबनासाठी राबविण्यात येणाऱ्या विविध उपक्रमांची माहिती सहभागी महिलांना समजावून सांगण्यात आली. बैठकीमध्ये अमृत क्लाउड किचन, अमृत पेठ (ऑनलाइन व ऑफलाइन विक्री संकल्पना), ई-व्ही (EV) चार्जिंग स्टेशन उपक्रम, तसेच उद्योजकता विकास प्रशिक्षण (EDP) याविषयी सविस्तर मार्गदर्शन करण्यात आले. या योजनांमधून महिलांना स्वतःचा व्यवसाय सुरू करण्याच्या संधी, कौशल्यविकासाचे महत्त्व, शासनाच्या विविध योजनांचा लाभ कसा घ्यावा आणि आर्थिकदृष्ट्या सक्षम होण्यासाठी उपलब्ध असलेल्या सुविधांची माहिती देण्यात आली. अमृत सखी सौ. मंजू कुलकर्णी यांनी उपस्थित महिलांच्या विविध शंकांचे निरसन करत अमृतच्या योजनांचा लाभ घेऊन स्वतःचा उद्योग सुरू करण्याचे आवाहन केले. त्यांनी महिलांना आत्मनिर्भर बनण्यासाठी शासनाच्या विविध योजनांचा लाभ घेण्याचे आणि उद्योजकतेच्या दिशेने पाऊल टाकण्याचे आवाहन केले. या बैठकीमुळे महिलांना अमृतच्या विविध उपक्रमांची माहिती मिळाली असून, स्वयंरोजगार आणि आर्थिक स्वावलंबनाकडे एक महत्त्वाचे पाऊल उचलण्यास प्रेरणा मिळाल्याचे उपस्थितांनी सांगितले.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/