प्रशिक्षणातून आत्मनिर्भरतेकडे — अमृतच्या सूर्यमित्रांची यशोगाथा

“प्रशिक्षणाची संधी मिळाली आणि रोजगार शोधण्याऐवजी स्वतः रोजगार निर्माण करण्याचा आत्मविश्वास मिळाला!” महाराष्ट्र शासनाच्या अमृत (महाराष्ट्र संशोधन, उन्नती व प्रशिक्षण प्रबोधिनी) या संस्थेच्या माध्यमातून धाराशिव जिल्ह्यातील युवकांना कौशल्याधारित प्रशिक्षणाच्या संधी उपलब्ध करून देण्यात येत आहेत. या उपक्रमातून मिळालेल्या प्रशिक्षणाचा लाभ घेत संतोष तिवारी आणि पंकज देशपांडे, रा. ढोकी, ता. धाराशिव यांनी सौर ऊर्जा क्षेत्रात स्वतःचा व्यवसाय सुरू करून आत्मनिर्भरतेच्या दिशेने यशस्वी वाटचाल सुरू केली आहे.

दोन्ही लाभार्थींनी लातूर येथे 18 दिवसांचे ‘अमृत सूर्यमित्र’ सोलार प्रशिक्षण यशस्वीरीत्या पूर्ण केले. या प्रशिक्षणादरम्यान सौर ऊर्जा प्रणालीची माहिती, सोलार पॅनेलची बसवणूक, देखभाल-दुरुस्ती तसेच प्रत्यक्ष व्यवसायासाठी आवश्यक तांत्रिक कौशल्ये आत्मसात करण्याची संधी त्यांना मिळाली.

विशेष म्हणजे, अमृत संस्थेच्या माध्यमातून हे संपूर्ण प्रशिक्षण विनामूल्य देण्यात आले. तसेच प्रशिक्षण कालावधीतील निवासाची सुविधाही मोफत उपलब्ध करून देण्यात आली. त्यामुळे आर्थिक अडचणींमुळे प्रशिक्षणापासून दूर राहणाऱ्या युवकांसाठी ही संधी अत्यंत उपयुक्त ठरली. प्रशिक्षण पूर्ण केल्यानंतर संतोष तिवारी आणि पंकज देशपांडे यांनी मिळवलेल्या कौशल्याचा उपयोग करत स्वतःचा सोलार व्यवसाय सुरू केला आहे. आज ते केवळ स्वतःसाठी रोजगार निर्माण करत नाहीत, तर सौर ऊर्जेचा वापर वाढविण्यासाठी समाजातही योगदान देत आहेत. ही यशोगाथा म्हणजे केवळ दोन युवकांच्या व्यवसायाची सुरुवात नाही; तर कौशल्य प्रशिक्षणातून युवकांना आत्मनिर्भर बनविण्याच्या अमृत संस्थेच्या प्रयत्नांचे एक प्रेरणादायी उदाहरण आहे.

“योग्य प्रशिक्षण + योग्य संधी + मेहनत = आत्मनिर्भरतेकडे यशस्वी वाटचाल” धाराशिव जिल्ह्यातील संतोष तिवारी आणि पंकज देशपांडे यांची ही वाटचाल इतर युवकांसाठीही निश्चितच प्रेरणादायी आहे. कौशल्याला संधी मिळाली तर युवक स्वतःचे भविष्य घडवू शकतो आणि ‘नोकरी मागणारा’ न राहता ‘रोजगार निर्माण करणारा’ बनू शकतो, हे त्यांनी आपल्या कृतीतून सिद्ध केले आहे. 🌱 अमृतचा संकल्प

कौशल्य प्रशिक्षणातून युवकांना सक्षम करणे, त्यांना व्यवसायाच्या संधी उपलब्ध करून देणे आणि आत्मनिर्भर महाराष्ट्राच्या निर्मितीत योगदान देणे. लाभार्थी : • श्री. संतोष तिवारी — ढोकी, ता. धाराशिव • श्री. पंकज देशपांडे — ढोकी, ता. धाराशिव प्रशिक्षण : अमृत सूर्यमित्र – सोलार प्रशिक्षण प्रशिक्षण कालावधी : 18 दिवस प्रशिक्षण स्थळ : लातूर प्रशिक्षण शुल्क : अमृत संस्थेमार्फत पूर्णपणे मोफत निवास व्यवस्था : मोफत परिणाम : प्रशिक्षणानंतर स्वतःचा सोलार व्यवसाय सुरू

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/