कास पठारावर फुलांचा मोसम आकारास; साताऱ्यातील धबधबे आणि निसर्ग पर्यटनाला उधाण

ऑगस्टच्या दुसऱ्या आठवड्यापासून पश्चिम घाटातील निसर्गसौंदर्य पूर्ण वैभवात आले असून, युनेस्कोचे जागतिक वारसा स्थळ असलेल्या जगप्रसिद्ध कास पठारावर फुलांच्या हंगामाची पूर्वतयारी सुरू झाली आहे. चालू ऑगस्ट महिन्यात कास पठारावर विविध प्रकारच्या दुर्मिळ, रंगीबेरंगी रानफुलांच्या कळ्या उमलण्यास सुरुवात झाली असून लवकरच हे पठार निसर्गप्रेमींसाठी निसर्गाची अद्भूत किमया घेऊन सज्ज होणार आहे.

कास पठारावर उमलणाऱ्या दुर्मिळ रानफुलांची सृष्टी अनुभवण्यासाठी दरवर्षी देशभरातून हजारो पर्यटक साताऱ्यात हजेरी लावतात. सध्याच्या काळात पठारावर कळ्या आणि लहान फुलांचे नयनरम्य दृश्य दिसू लागले असून, येत्या काही आठवड्यांत रंगीबेरंगी फुलांची हिरवी-जांभळी-पिवळी चादर पसरलेली पाहायला मिळेल. वनविभाग आणि कास पठार कार्यकारी समितीकडून पर्यटकांच्या स्वागतासाठी व सुरक्षेसाठी आवश्यक ती पूर्वतयारी अंतिम टप्प्यात आहे.

धबधबे वाहू लागले पूर्ण क्षमतेने-

ऑगस्ट महिन्यातील मुसळधार पावसामुळे साताऱ्यातील प्रमुख धबधबे सध्या पर्यटकांचे मुख्य आकर्षण ठरत आहेत. आशिया खंडातील दुसऱ्या क्रमांकाचा उंच मानला जाणारा भांबवली वजराई धबधबा, तसेच जगप्रसिद्ध ठोसेघर धबधबा सध्या पूर्ण वैभवाने ओसंडून वाहत आहेत. याशिवाय कोयना आणि महाबळेश्वर परिसरातील निसर्गरम्य दऱ्या आणि हिरवेगार डोंगर निसर्गप्रेमींना भुरळ घालत आहेत.

रस्ते मार्गाने (बाय रोड)

सातारा ते कास पठार: सातारा शहरातून कास रोडने घाटाचा रस्ता पकडून ४५ ते ६० मिनिटांत कास पठारावर पोहोचता येते.
पार्कची माहिती: मुख्य पठारावर खाजगी वाहने नेण्यास बंदी असते. ठरवलेल्या पार्किंग क्षेत्रामध्ये गाडी पार्क करून पुढे जाण्यासाठी बसची सुविधा असते.

रेल्वे मार्गाने (बाय ट्रेन)

जवळचे रेल्वे स्टेशन: सातारा हे सर्वात जवळचे रेल्वे स्टेशन आहे.
स्टेशनवरून पुढे: सातारा रेल्वे स्टेशन बाहेरून एसटी बसेस, टॅक्सी किंवा ऑटो रिक्षा करून कास पठारापर्यंत जाता येते.

कास पठाराच्या आजूबाजूला कास तलाव, वजराई व ठोसेघर धबधबे, सज्जनगड आणि अजिंक्यतारा किल्ला ही प्रमुख प्रेक्षणीय स्थळे आहेत.

विमान मार्गाने (बाय एअर)

जवळचे विमानतळ: पुणे आंतरराष्ट्रीय विमानतळ हे कास पठारापासून जवळजवळ १४० किलोमीटर अंतरावर आहे.
पुण्याहून पुढे: विमानतळावरून किंवा पुण्यातून टॅक्सी अथवा बसने सातारा आणि नंतर कास पठार गाठता येते.

आजूबाजूची प्रमुख प्रेक्षणीय स्थळे-

कास तलाव: पठारापासून अगदी जवळ असलेला हा एक शांत आणि सुंदर तलाव आहे, जो घनदाट जंगलाने वेढलेला आहे.
वजराई धबधबा: हा भारतामधील एक उंचावर असलेला आणि तीन टप्प्यांत कोसळणारा प्रसिद्ध व सुंदर धबधबा आहे.
ठोसेघर धबधबा: पावसाळ्यात पाहायला मिळणारा हा एक भव्य आणि उंच धबधबा पर्यटकांचे मुख्य आकर्षण आहे.
सज्जनगड किल्ला: समर्थ रामदास स्वामींची समाधी असलेला हा ऐतिहासिक व धार्मिक किल्ला कासपासून जवळच आहे.
अजिंक्यतारा किल्ला: सातारा शहराच्या जवळ असलेला हा किल्ला तिथून संपूर्ण शहराचा व परिसराचा सुंदर नजरा दाखवतो.

-संकलित