नागपूरमध्ये 'अमृतपेठ थेट बाजारपेठ' उत्साहात संपन्न

नागपूर येथे दिनांक २६ जुलै २०२६ रोजी आयोजित करण्यात आलेली 'अमृतपेठ थेट बाजारपेठ' ही भव्य प्रदर्शनी मोठ्या उत्साहात व नागरिकांच्या उत्स्फूर्त प्रतिसादात संपन्न झाली. या प्रदर्शनामध्ये ज्वेलरी, कपडे, हस्तकला, घरगुती उत्पादने, खाद्यपदार्थ तसेच विविध लघुउद्योगांच्या उत्पादनांचे आकर्षक स्टॉल उभारण्यात आले होते. सर्व प्रकारची उत्पादने एकाच छताखाली उपलब्ध झाल्यामुळे नागरिकांनी मोठ्या संख्येने प्रदर्शनाला भेट देत खरेदीचा आनंद घेतला. दिवसभर प्रदर्शन परिसरात मोठ्या प्रमाणावर गर्दी असून स्टॉलधारकांना समाधानकारक प्रतिसाद मिळाला. प्रदर्शनात सहभागी झालेल्या अनेक स्टॉलधारकांनी या उपक्रमाचे कौतुक करत चांगली विक्री झाल्याची भावना व्यक्त केली. अशा प्रकारचे व्यासपीठ नियमितपणे उपलब्ध झाल्यास लघुउद्योजकांना व्यवसाय वाढीसाठी मोठी संधी मिळेल, असेही त्यांनी सांगितले. 'अमृतपेठ' या उपक्रमाचा मुख्य उद्देश लघुउद्योजक, महिला बचतगट, नवउद्योजक आणि स्थानिक उत्पादकांना थेट ग्राहकांपर्यंत पोहोचण्यासाठी हक्काचे व्यासपीठ उपलब्ध करून देणे हा होता. मध्यस्थांशिवाय विक्रीची संधी उपलब्ध झाल्यामुळे उद्योजकांना अधिक नफा मिळविण्यास मदत झाली, तर नागरिकांनाही दर्जेदार आणि वैविध्यपूर्ण उत्पादने एकाच ठिकाणी उपलब्ध झाली. नागरिकांचा उत्स्फूर्त सहभाग, स्टॉलधारकांचा सकारात्मक प्रतिसाद आणि समाधानकारक विक्रीमुळे 'अमृतपेठ' हा उपक्रम सर्वार्थाने यशस्वी ठरला असून भविष्यात अशा उपक्रमांचे अधिक व्यापक स्वरूपात आयोजन करण्यात येणार आहे.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी व भूमिहार अशा  जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/