म्हैसमाळचे तिरुपती बालाजी मंदिर - पावसाळ्यात पाहावेच असे स्थळ

पावसाळ्याच्या आगमनानंतर छत्रपती संभाजीनगर जिल्ह्यातील खुलताबाद तालुक्यात वसलेले म्हैसमाळ हे थंड हवामानाचे पर्यटनस्थळ नव्या सौंदर्याने खुलून आले आहे. हिरवागार निसर्ग, सतत बरसणारा पाऊस आणि डोंगररांगांवर पसरलेले दाट धुके यामुळे येथील तिरुपती बालाजी मंदिराचे सौंदर्य अधिकच खुलून दिसत आहे. म्हैसमाळमध्ये उभारलेले तिरुपती बालाजी मंदिर पावसाळ्यात जणू धुक्याच्या दुलईत हरवून जाते. मंदिर परिसरात वाहणारे थंड वारे, ढगांची सतत होणारी वर्दळ आणि आजूबाजूला पसरलेली हिरवाई पर्यटकांना व भाविकांना मंत्रमुग्ध करते. सकाळच्या आणि सायंकाळच्या वेळी धुक्याचे शुभ्र आवरण मंदिराभोवती पसरल्याने येथील दृश्य अत्यंत मनमोहक दिसते. दरवर्षी पावसाळ्यात मोठ्या संख्येने पर्यटक, छायाचित्रकार आणि निसर्गप्रेमी या ठिकाणी भेट देतात. मंदिराचे शांत आणि प्रसन्न वातावरण भाविकांना आध्यात्मिक समाधान देत असून, त्याचबरोबर निसर्गाच्या सान्निध्यात काही क्षण घालविण्याची अनोखी संधी मिळते. धुक्यातून दिसणारे मंदिर, पावसाच्या सरी आणि डोंगरकड्यांवरील हिरवाई यामुळे म्हैसमाळ हे मराठवाड्यातील लोकप्रिय पावसाळी पर्यटनस्थळ म्हणून ओळखले जाते. पावसाळ्यातील हा निसर्गरम्य नजारा अनुभवण्यासाठी अनेक पर्यटक आठवड्याच्या सुट्ट्यांमध्ये म्हैसमाळकडे आकर्षित होत आहेत. प्रशासनाने पर्यटकांनी पावसाळ्यात सुरक्षिततेची काळजी घेऊनच प्रवास करावा, तसेच परिसराची स्वच्छता राखून निसर्गाचे जतन करावे, असे आवाहन केले आहे. संदर्भ

-संकलित