भद्रावती येथील श्री वरदविनायक

महाराष्ट्रातील चंद्रपूर जिल्हा हा धार्मिक, ऐतिहासिक आणि नैसर्गिक वारशासाठी प्रसिद्ध आहे. या जिल्ह्याच्या भद्रावती तालुक्यात वसलेले गौराळा येथील श्री वरदविनायक गणपती मंदिर हे विदर्भातील अत्यंत प्रसिद्ध आणि श्रद्धास्थान असलेले गणेश मंदिर आहे. विदर्भाचा वरदविनायक म्हणून ओळखले जाणारे हे मंदिर हजारो भाविकांच्या श्रद्धेचे केंद्र आहे. शांत वातावरण, प्राचीन परंपरा आणि भक्तिमय ऊर्जा यामुळे या मंदिराला विशेष महत्त्व प्राप्त झाले आहे.

स्थानिक परंपरा आणि आख्यायिकांनुसार हे मंदिर अत्यंत प्राचीन आहे. मंदिरातील गणेशमूर्ती स्वयंभू असल्याची श्रद्धा अनेक भक्तांमध्ये आढळते. अनेक संत, भक्त आणि स्थानिक नागरिकांचे मंदिराच्या जतनासाठी योगदान आहे. असे मानले जाते, की या मंदिरात गणपतीचे वरदविनायक रूप विराजमान आहे. वरद म्हणजे वरदान देणारा आणि विनायक म्हणजे विघ्नहर्ता गणेश. त्यामुळे येथे येणाऱ्या भक्तांच्या मनोकामना पूर्ण होतात, संकटे दूर होतात आणि जीवनात सुख-समृद्धी येते अशी श्रद्धा आहे. मंदिराची वास्तू साधी, पण आकर्षक आहे. पारंपरिक हिंदू मंदिर स्थापत्यशैलीचा प्रभाव येथे दिसून येतो. मंदिरात प्रवेश करताच भक्तांना एक वेगळीच शांतता आणि आध्यात्मिक ऊर्जा जाणवते.

मंदिर परिसर हिरवाईने नटलेला असून सकाळच्या आणि सायंकाळच्या वेळी येथे अतिशय प्रसन्न वातावरण असते. मंदिराजवळील नैसर्गिक सौंदर्य भाविकांना मानसिक शांतता प्रदान करते. मंदिरातील गणेशमूर्ती अत्यंत देखणी आणि आकर्षक आहे. गणरायाची मुद्रा शांत, प्रसन्न आणि भक्तांना आशीर्वाद देणारी आहे. गणेशाच्या दर्शनाने भक्तांच्या मनातील चिंता दूर होतात, अशी श्रद्धा आहे. भाविक विशेषतः नारळ अर्पण करतात. दूर्वा आणि लाल फुले वाहतात. मोदकाचा नैवेद्य दाखवतात. संकष्टीच्या दिवशी उपवास करून दर्शन घेतात 

धार्मिक आणि आध्यात्मिक महत्त्व

गौराळा येथील हे मंदिर विदर्भातील अष्टविनायकांपैकी एक मानले जाते. चंद्रपूर, नागपूर, यवतमाळ, गडचिरोली, तसेच महाराष्ट्रातील विविध भागांतून भक्त येथे दर्शनासाठी येतात. भक्तांचा असा विश्वास आहे, की नवीन काम सुरू करण्यापूर्वी येथे दर्शन घेतल्यास यश मिळते, अडथळे दूर होतात, कौटुंबिक सुख आणि समृद्धी वाढते. विद्यार्थ्यांना बुद्धी आणि यश प्राप्त होते.

गणेशोत्सव काळात मंदिरात मोठ्या प्रमाणावर भक्तांची गर्दी असते. आकर्षक सजावट, भजन, कीर्तन आणि धार्मिक कार्यक्रम आयोजित केले जातात. प्रत्येक संकष्टीला विशेष पूजा आणि आरती केली जाते. रात्री चंद्रदर्शनानंतर भाविक मोठ्या भक्तिभावाने गणरायाचे दर्शन घेतात.

विक्रम पांडे - 9112228774 

चंद्रपूर जिल्हा व्यवस्थापक, अमृत