सूर्यनगरी सोलापूर आता सूर्यमित्रांच्या तेजाने लखलखणार!

​सोलापूर : सूर्यनगरी म्हणून ओळखल्या जाणाऱ्या सोलापुरात आता घराघरांवर सौर ऊर्जानिर्मितीची पॅनेल्स पोहोचवण्यासाठी कुशल सूर्यमित्रांची फौज सज्ज झाली आहे. महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था आणि महाराष्ट्र उद्योजकता विकास केंद्र (एमसीईडी) यांच्या संयुक्त विद्यमाने आयोजित करण्यात आलेल्या अमृत सूर्यमित्र या १८ दिवसांच्या विशेष प्रशिक्षण शिबिराचा नुकताच सोलापुरात समारोप झाला.

​प्रशिक्षणाने दिली यशाची 'गॅरेंटी'
​आजचा काळ महागाईचा असला, तरी मोफत वीज हे आता स्वप्न राहिलेले नाही. केंद्र आणि राज्य सरकारच्या सौर योजनांमुळे या क्षेत्रात कामाचा डोंगर उभा आहे; पण हे काम करण्यासाठी प्रशिक्षित हातांची संख्या कमी आहे. अमृत आणि 'एमसीईडी या संस्थांनी हीच गरज ओळखून सोलापूरच्या तरुणांना अत्याधुनिक तंत्रज्ञानाचे बाळकडू दिले.

​ठळक वैशिष्ट्ये :​
केवळ थिअरी नाही, तर थेट प्रॅक्टिकलही : प्रशिक्षणार्थींनी इमारतींच्या छतावर जाऊन सोलर पॅनेलची उभारणी, वायरिंग आणि बॅटरी बॅकअपचे बारकावे प्रत्यक्ष अनुभवले, त्याचे धडे गिरवले.
​उद्योजकतेचे बाळकडू : केवळ नोकरी नाही, तर स्वतःची कंपनी कशी स्थापन करावी आणि शासकीय निविदा (टेंडर्स) कशा भराव्यात, याचे विशेष मार्गदर्शन एमसीईडी संस्थेकडून देण्यात आले.
समारोपप्रसंगी तरुण-तरुणींच्या चेहऱ्यावर असलेला आनंद हा 'आता आपण आपल्या पायावर उभे राहू शकतो' या आत्मविश्वासाची साक्ष देत होता.​

सोलापूर ठरणार 'सोलर हब'
​समारोप समारंभाला उपस्थित असलेल्या मान्यवरांनी सांगितले, की "सोलापूरचे तापमान हे सौर ऊर्जानिर्मितीसाठी वरदान आहे. अमृत आणि एमसीईडीच्या या उपक्रमामुळे सोलापूर आता केवळ कापड गिरण्यांचे शहर न राहता, पश्चिम महाराष्ट्राचे 'सोलर हब' म्हणून नावारूपास येईल."

​प्रशिक्षणार्थींच्या भावना
'​पदवीधर असूनही बेरोजगार होतो; पण या १८ दिवसांच्या प्रशिक्षणाने जगण्याचे नवे साधन दिले आहे,' अशी प्रातिनिधिक भावना प्रशिक्षणार्थ्यांकडून व्यक्त झाली. स्वतःची सोलर इन्स्टॉलेशन फर्मही अनेक जण सुरू करणार आहेत.

​यावेळी अमृत संस्थेचे जिल्हा व्यवस्थापक श्रेयस कुलकर्णी यांनी उपस्थितांना संबोधित केले. त्यांनी सर्व प्रशिक्षणार्थींना त्यांच्या भावी वाटचालीस शुभेच्छा दिल्या. तसेच शासनाच्या विविध योजनांची माहिती घेऊन त्यांचा जास्तीत जास्त लाभ घेण्याचे आवाहन केले.

अधिक माहितीसाठी संपर्क :
अमृत संस्थेचे सोलापूर जिल्हा कार्यालय
५३७, दक्षिण कसबा, श्री समर्थ संकुल,
पहिला मजला, सोलापूर ४१३००७
मोबाइल : ९११२२२८७६७

अमृत संस्थेविषयी :
महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्षीत गट आहे. त्यामध्ये ब्राह्मण, कोमटी, मारवाडी,ठाकूर, गुजराती, सिंधी, कायस्थ, जाट, बणिया, बंत्स, नायर अय्यंगार, पाटीदार, बंगाली, पटेल, येलमार, त्यागी, सेनगुनथर, राजपुरोहित, नायडू, एलमार इत्यादींचा समावेश आहे. अशा जातींमधल्या वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात.

अधिक माहितीसाठी आपापल्या जिल्ह्यातील ‘अमृत’ कार्यालयाशी संपर्क साधावा. तसेच, ‘अमृत’चे संकेतस्थळ आणि सोशल मीडिया हँडल्स पाहावीत.

संकेतस्थळ : https://mahaamrut.org.in/