श्रीकृष्ण कोल्डप्रेस्ड ऑइल : आरोग्य, पर्यावरण, स्वदेशी आणि आत्मनिर्भरतेचा संगम

आजच्या स्पर्धात्मक युगात आरोग्य, पर्यावरण आणि आत्मनिर्भरता या तिन्ही बाबींचा समतोल साधणारा व्यवसाय उभा करणे हे खरोखरच कौतुकास्पद आहे. परांडा (जि. धाराशिव) येथील युवा उद्योजक दत्तप्रसाद पाटील यांनी हा आदर्श प्रत्यक्षात उतरवून श्रीकृष्ण कोल्डप्रेस्ड ऑइल या नावाने शुद्ध व नैसर्गिक तेलांचा व्यवसाय यशस्वीपणे सुरू केला आहे.

श्रीकृष्ण कोल्डप्रेस्ड ऑइल या उद्योगामध्ये आरोग्य आणि सुरक्षितता या दोन महत्त्वाच्या घटकांवर विशेष भर देण्यात आला आहे. बदलत्या जीवनशैलीमुळे वाढत चाललेल्या आजारांवर उपाय म्हणून शीत-दाबप्रक्रियेने (कोल्डप्रेस्ड) काढलेल्या शुद्ध तेलांचा वापर वाढावा, हाच या व्यवसायामागील मुख्य उद्देश आहे.

या व्यवसायात तीळ, शेंगदाणा, करडी व सूर्यफूल यांसारख्या तेलबियांपासून शीत-दाबप्रक्रियेच्या साह्याने (कोल्डप्रेस्ड) शुद्ध, रसायनमुक्त तेलांचे उत्पादन केले जाते. विशेष बाब म्हणजे या तेलबिया स्वतःच्या शेतात कोणतेही रासायनिक खत किंवा औषधे न वापरता पूर्णतः नैसर्गिक पद्धतीने पिकवण्यात येतात. आजच्या काळात ही बाब आरोग्यदृष्ट्या अत्यंत महत्त्वाची ठरते.

कमी गुंतवणूक, मोठी रोजगार क्षमता आणि वाढती आरोग्यजाणीव यांचा योग्य वापर करून हा व्यवसाय उभा करण्यात आला आहे. स्थानिक युवकांना रोजगाराच्या संधी उपलब्ध करून देत हा उपक्रम पर्यावरणपूरक आणि शाश्वत विकासाचा आदर्श निर्माण करतो.

मार्केटिंग कौशल्याचा प्रभावी वापर करून श्री. पाटील यांनी नैसर्गिक व शुद्ध तेलांचा विश्वासू ग्राहकवर्ग निर्माण केला आहे. स्थानिक बाजारपेठेपासून सुरुवात करून आज हा व्यवसाय कुरिअर सेवेद्वारे संपूर्ण देशभर होम डिलिव्हरी करत आहे, ही बाब विशेष उल्लेखनीय आहे.

या व्यवसायातील आणखी एक मोठे यश म्हणजे त्यांनी स्वतः विकसित केलेले नैसर्गिक गाळणी यंत्र. कोणतेही रासायनिक विद्राव्य घटक न वापरता तयार केलेले हे गाळणी यंत्र तेलाची शुद्धता व गुणवत्ता कायम ठेवण्यात मोलाची भूमिका बजावते. हे यंत्र म्हणजे त्यांच्या संशोधनशीलतेचा आणि नवकल्पनांचा उत्तम नमुना आहे.

एकूणच, श्रीकृष्ण कोल्डप्रेस्ड ऑइल हा केवळ व्यवसाय नसून, आरोग्य, पर्यावरण आणि स्वदेशी विचारधारेचा संगम आहे. युवकांसाठी प्रेरणादायी ठरणारा हा उपक्रम 'शेती ते ग्राहक' या साखळीला नवे बळ देणारा आहे. अशा उद्योजकांमुळेच ग्रामीण भागातूनही देशाला दिशा देणारे उद्योग उभे राहतात, यात शंका नाही.
.........
अशा प्रकारचे उद्योजक उभे करण्यासाठी अमृत ही राज्य शासनाची स्वायत्त संस्था कार्यरत आहे. या संस्थेद्वारे खुल्या प्रवर्गातील आर्थिकदृष्ट्या दुर्बल घटकांना विविध प्रकारच्या योजनांद्वारे अर्थसाह्य केले जाते. तसेच प्रशिक्षण देऊन स्वयंरोजगारासाठी प्रोत्साहन दिले जाते. अमृतपेठ डॉट कॉम ही अमृत संस्थेने लघुउद्योजकांसाठी सुरू केलेली ऑनलाइन बाजारपेठ आहे.