प्रिया पॉल

काही सामर्थ्यशाली महिला प्रवाहाच्या विरुद्ध जातात. त्यांचा स्वत:वर आणि स्वत:च्या कर्तृत्वावर विश्वास असतो. त्या विश्वासाच्या जोरावर त्या आपले लक्ष्य गाठतात. त्याला साथ असते अविश्रांत मेहनतीची. अशीच एक कर्तृत्वशाली महिला म्हणजे प्रिया पॉल.

प्रिया पॉल या प्रसिद्ध एपीजे सुरेंद्र ग्रुपच्या अध्यक्षा आहेत. त्या प्रामुख्याने द पार्क हॉटेल्स या आलिशान हॉटेल साखळीचे नेतृत्व करतात. त्यांचे प्राथमिक शिक्षण कोलकाता येथे झाले. त्यानंतर त्यांनी अमेरिकेतील वेलेस्ली कॉलेजमधून अर्थशास्त्रात पदवी प्राप्त केली. वयाच्या २१व्या वर्षी त्यांनी आपल्या वडिलांच्या (सुरेंद्र पॉल) मार्गदर्शनाखाली कामाला सुरुवात केली. वडिलांच्या निधनानंतर त्यांनी व्यवसायाची धुरा अत्यंत समर्थपणे सांभाळली आणि द पार्क हॉटेल्सला एक जागतिक ओळख मिळवून दिली. त्यांना भारत सरकारकडून २०१२मध्ये पद्मश्री या नागरी पुरस्काराने सन्मानित करण्यात आले आहे. तसेच, त्यांना बिझनेस वुमन ऑफ द इयर यांसारखे अनेक प्रतिष्ठित पुरस्कार मिळाले आहेत. त्यांना भारतातील डिझाइन हॉटेल संकल्पनेच्या प्रवर्तक मानले जाते. हॉटेल व्यवसायाव्यतिरिक्त त्या कला आणि संस्कृती क्षेत्रांतही सक्रिय आहेत.

(संकलित)