श्रावणात काशी विश्वनाथ मंदिर झाले शिवभक्तांचे श्रद्धास्थान

हिंदू धर्मात काशी यात्रेला अनन्यसाधारण महत्त्व आहे. काशी येथे जाऊन भगवान विश्वनाथाचे दर्शन आणि गंगास्नान केल्याने पुण्यलाभ होतो, अशी भाविकांची श्रद्धा आहे. सर्वांनाच काशीला जाणे शक्य होत नसल्याने छत्रपती संभाजीनगरजवळील भालगाव परिसरात उभारण्यात आलेले काशी विश्वनाथ मंदिर भाविकांसाठी श्रद्धास्थान ठरले आहे.

छत्रपती संभाजीनगरपासून सुमारे २० किलोमीटर अंतरावर, धुळे–सोलापूर महामार्गावरील बीड बायपास रोडलगत हे मंदिर उभारण्यात आले आहे. विश्वनाथ घुगे कुटुंबीयांनी आपल्या आई-वडिलांच्या स्मरणार्थ २०१७ मध्ये या मंदिराची उभारणी केली.

मंदिराचे प्रमुख वैशिष्ट्य म्हणजे येथे दोन गर्भगृहे आहेत. तळघरातील गर्भगृहात सुमारे सहा फूट उंचीची भव्य शिवपिंडी असून शाळुंकेच्या टोकाला गायीचे मुख आहे. मंदिरातील सभामंडप, आकर्षक कमानी, कलाकुसर केलेले गजराज तसेच विविध देवतांच्या मूर्ती भाविकांचे लक्ष वेधून घेतात.श्रावण महिन्यात मंदिरात विशेष धार्मिक वातावरण निर्माण झाले असून भगवान शिवाच्या दर्शनासाठी भाविक मोठ्या संख्येने येत आहेत. विशेषतः श्रावणी सोमवारनिमित्त मंदिरात सकाळपासूनच भाविकांची गर्दी होत असून हर हर महादेवच्या जयघोषाने परिसर भक्तिमय होत आहे. भाविकांकडून शिवपिंडीवर अभिषेक, बेलपत्र व फुले अर्पण करून मनोभावे पूजा केली जात आहे.

श्रावणी सोमवारी भगवान महादेवांना विविध रूपांमध्ये आकर्षक अलंकार व साजशृंगार करण्यात येतो. फुले, बेलपत्र आणि विविध पूजासाहित्याने शिवपिंडीचा विशेष शृंगार केला जात असल्याने हे मनोहारी रूप पाहण्यासाठी भाविकांची मोठी गर्दी होत आहे. दर सोमवारी महादेवांचे वेगवेगळे रूप भाविकांचे विशेष आकर्षण ठरत आहे.

श्रावण महिन्यात मंदिरात येणाऱ्या भाविकांना महाप्रसादाचाही लाभ दिला जात असल्याने मंदिर परिसरात भक्ती आणि उत्साहाचे वातावरण पाहायला मिळत आहे.

संदर्भ -https://pilgrimdata.in/

आसपासची महत्त्वाची पर्यटनस्थळे अशी आहेत:

• बीबी का मकबरा – ऐतिहासिक वास्तू आणि शहराची प्रमुख ओळख.
• पंचक्की – ऐतिहासिक जलव्यवस्था आणि धार्मिक स्थळ.
• सोनरी महल – ऐतिहासिक महत्त्व असलेली वास्तू.
• औरंगाबाद लेणी – प्राचीन बौद्ध लेणी.
• दौलताबाद किल्ला – यादवकालीन इतिहासाची साक्ष देणारा भव्य किल्ला.
• घृष्णेश्वर ज्योतिर्लिंग मंदिर – वेरूळजवळील भगवान शिवाचे बारावे ज्योतिर्लिंग; श्रावणात विशेष धार्मिक महत्त्व.
• वेरूळ लेणी – कैलास मंदिरासह प्रसिद्ध जागतिक वारसा स्थळ.
• गौतमेश्वर मंदिर – परिसरातील धार्मिक पर्यटनासाठी उपयुक्त स्थळ.

संकलित -