श्री क्षेत्र गणपतीपुळे

गणपतीपुळे हे महाराष्ट्राच्या रत्नागिरी जिल्ह्यातील एक प्रसिद्ध तीर्थक्षेत्र आणि निसर्गरम्य पर्यटनस्थळ आहे. कोकण किनारपट्टीवरील हा समुद्रकिनारा त्याच्या सुंदर पांढऱ्या वाळूसाठी, शांततेसाठी आणि श्री गणपतीच्या प्राचीन अशा मंदिरासाठी प्रसिद्ध आहे. समुद्राच्या लाटांचा नाद, हिरव्यागार टेकड्या, आणि निसर्गाच्या कुशीत विसावलेले गणपतीपुळे हे ठिकाण पर्यटकांसाठी आणि भक्तांसाठी स्वर्गाहून कमी नाही.

गणपतीपुळे मुंबईपासून सुमारे ३७५ किलोमीटर आणि पुण्यापासून सुमारे ३३० किलोमीटर अंतरावर आहे. गणपतीपुळे हे धार्मिक दृष्टिकोनातून खूप महत्त्वाचे ठिकाण आहे. या गावातील प्राचीन स्वयंभू गणेश मंदिर कोकणातील एक प्रमुख तीर्थक्षेत्र आहे. येथे गणपतीची मूर्ती समुद्राकडे तोंड करून आहे. ही स्थिती अतिशय दुर्मीळ मानली जाते. फेब्रुवारी-मार्च महिन्यात येथे मोठी जत्रा भरते. तिथे देशभरातून भक्तगण दर्शनासाठी येतात. संध्याकाळी समुद्रकिनाऱ्यावरून दिसणारा सूर्यास्त हा एका चित्रासारखा वाटतो. तसेच मंगळेश्वर टेकडीवरून समुद्रकिनाऱ्याचे ३६० अंशांचे दृश्य पाहण्याचा अनुभव अविस्मरणीय असतो. 

गणपतीपुळ्याच्या परिसरात नारळ, पोफळीच्या बागा, आणि रंगीबेरंगी पक्ष्यांचे दर्शन होते. ते पर्यावरणप्रेमींना खूप आवडते. कोकणातील पारंपरिक पदार्थांचा आस्वाद घेण्यासाठी गणपतीपुळे हे एक आदर्श ठिकाण आहे. गणपतीपुळे हे पर्यटनासाठी वर्षभर योग्य आहे; पण ऑक्टोबर ते मार्च हा काळ सर्वांत उत्तम मानला जातो. या काळात समुद्रकिनारी फिरण्यासाठी आदर्श हवामान असते. उन्हाळ्यात कोकणातील हापूस आंब्याचा आस्वाद घेण्यासाठी येथे उत्तम व्यवस्था असते.

तुम्हाला धार्मिक शांततेचा अनुभव, कोकणी पदार्थांचा आनंद घ्यायचा असेल आणि निसर्गाचा अविष्कार बघायचा असेल तर गणपतीपुळे तुमच्यासाठी सर्वोत्तम ठिकाण आहे.

(संदर्भ - maharashtratourism)