सकारात्मक वातावरणनिर्मिती आणि विविध समाजघटकांमध्ये संवाद वाढण्यास हातभार

महाराष्ट्र संशोधन, उन्नती व प्रशिक्षण प्रबोधिनी अर्थात अमृत या राज्य शासनाच्या स्वायत्त संस्थेतर्फे एप्रिल महिन्यात अमृत परिवार सर्वेक्षण करण्यात आले. अमृत ही संस्था खुल्या प्रवर्गातील आर्थिक दुर्बल घटकांच्या सर्वांगीण सक्षमीकरणासाठी कार्यरत आहे. संस्थेच्या योजना लक्ष्यित गटातील जास्तीत जास्त जणांपर्यंत पोहोचाव्यात, त्यांच्या अडचणी जाणून घ्याव्यात, याकरिता हे सर्वेक्षण करण्यात आले होते. मध्य नागपुरातील सर्वेक्षणाविषयी...

मध्य नागपूर परिसरात अमृत परिवार सर्वेक्षण अभियानाची सुरुवात आठ एप्रिल २०२६पासून करण्यात आली. या अभियानाचा मुख्य उद्देश शहरी भागातील कुटुंबांची अचूक माहिती संकलित करणे, तसेच विविध सामाजिक घटकांशी संपर्क प्रस्थापित करणे हा होता. या सर्वेक्षणासाठी मध्य नागपुरातील विविध प्रभाग व परिसरांमध्ये प्रत्यक्ष भेटी देण्याची जबाबदारी माझ्याकडे देण्यात आली होती. या अंतर्गत स्थानिक नगरसेवक, प्रभाग अधिकारी, सामाजिक कार्यकर्ते, तसेच प्रमुख नागरिक यांच्याशी संवाद साधून सर्वेक्षणाबद्दल सविस्तर माहिती देण्यात आली. नागरिकांशी थेट संपर्क साधून त्यांच्या कुटुंबीयांची आवश्यक माहिती व्यवस्थितपणे संकलित करण्यात आली.

सर्वेक्षण कालावधीत विविध भागांमध्ये जनजागृतीसाठी पोस्टर्स लावण्यात आली. तसेच घरभेटीद्वारे नागरिकांना अभियानाचे महत्त्व समजावून सांगण्यात आले. काही ठिकाणी लहान गटांमध्ये बैठकांचे आयोजन करून अमृत परिवार संकल्पना, सर्वेक्षणाचा उद्देश आणि भविष्यातील उपयोग याबाबत मार्गदर्शन करण्यात आले. याशिवाय, स्थानिक स्तरावर स्वयंसेवकांची टीम तयार करून त्यांना प्रभागनिहाय कामाचे वाटप करण्यात आले. प्रभाग व शहर स्तरावर समन्वय साधून विविध विभागांचे सहकार्य घेण्यात आले. संकलित माहिती अचूक, संपूर्ण आणि व्यवस्थित पद्धतीने नोंदवण्यावर विशेष भर देण्यात आला.

या संपूर्ण प्रक्रियेत नागरिकांकडून चांगला प्रतिसाद मिळाला. अनेक कुटुंबांनी स्वयंस्फूर्तीने सहभाग नोंदवला. काही भागांमध्ये विशेष उत्साह दिसून आला. त्यामुळे सर्वेक्षण अधिक प्रभावीपणे पूर्ण करता आले. या अभियानामुळे शहरी भागात सकारात्मक वातावरण निर्माण झाले आणि विविध सामाजिक घटकांमध्ये संवाद वाढण्यास मदत झाली.

एकूणच, मध्य नागपुरातील अमृत परिवार सर्वेक्षण अभियान यशस्वीरीत्या राबवण्यात आले आहे. या उपक्रमामुळे शहरात मजबूत संपर्क जाळे निर्माण झाले असून, भविष्यात या माहितीच्या आधारे अधिक प्रभावी आणि व्यापक कार्य करण्यास निश्चितच मदत होईल, असा विश्वास आहे. 

- ओंकार लक्ष्मण गांधी 

नागपूर विभागीय उपव्यवस्थापक, अमृत