श्री श्री रविशंकर

श्री श्री रविशंकर हे एक जागतिक स्तरावरील आध्यात्मिक गुरू आणि मानवतावादी नेते आहेत. त्यांचा जन्म १३ मे १९५६ रोजी तमिळनाडूतील पपनसम येथे झाला. बालपणापासूनच ते अध्यात्माकडे ओढले गेले होते. १९८१मध्ये त्यांनी 'आर्ट ऑफ लिव्हिंग' या संस्थेची स्थापना केली. ही संस्था जगभरातील १५०हून अधिक देशांमध्ये कार्यरत असून, ती तणावमुक्ती आणि सेवाकार्यासाठी ओळखली जाते. त्यांनी 'सुदर्शनक्रिया' या प्रसिद्ध श्वसन तंत्राचा शोध लावला. हे तंत्र शारीरिक आणि मानसिक आरोग्य सुधारण्यासाठी अत्यंत प्रभावी मानले जाते. शिक्षण, ग्रामीण विकास आणि आपत्ती निवारण क्षेत्रात त्यांचे मोठे योगदान आहे. त्यांनी जगभरातील अनेक संघर्षांमध्ये शांतता प्रस्थापित करण्यासाठी मध्यस्थी केली आहे. १९९७मध्ये त्यांनी 'इंटरनॅशनल असोसिएशन फॉर ह्यूमन व्हॅल्यूज' या संस्थेची स्थापना केली. ती एक स्वयंसेवी संस्था असून, मदतकार्य आणि ग्रामीण विकासाचे कार्य करते. सामायिक जागतिक मूल्यांना प्रोत्साहन देण्याचे तिचे उद्दिष्ट आहे. श्री श्री रविशंकर यांना त्यांच्या सेवाकार्यासाठी भारत, पेरू, कोलंबिया आणि पॅराग्वेसह अनेक देशांचे सर्वोच्च पुरस्कार मिळाले आहेत. भारत सरकारने २०१६मध्ये त्यांना 'पद्मविभूषण' या दुसऱ्या क्रमांकाच्या सर्वोच्च नागरी पुरस्काराने सन्मानित केले आहे.

(संकलित)