सोलापूरच्या सिद्धार्थ कुलकर्णीने अमेरिकेत प्राप्त केली 'मास्टर ऑफ कम्प्युटर सायन्स' पदवी

​सोलापूर : जिद्द, चिकाटी आणि कठोर परिश्रमाच्या जोरावर दक्षिण सोलापूर तालुक्यातील कासेगाव येथील तरुणाने आपल्या यशाचा झेंडा सातासमुद्रापार रोवला आहे. कासेगाव येथील सिद्धार्थ चंद्रकांत कुलकर्णी याने अमेरिकेच्या कॅलिफोर्निया राज्यातील नामांकित सॅन होजे स्टेट युनिव्हर्सिटीमधून मास्टर ऑफ कम्प्युटर सायन्स ही पदवी यशस्वीरीत्या प्राप्त केली आहे. एका ग्रामीण भागातील युवकाने मिळवलेल्या या जागतिक पातळीवरील यशामुळे सोलापूर जिल्ह्याच्या शिरपेचात मानाचा तुरा रोवला गेला आहे. ​नुकत्याच पार पडलेल्या पदवीदान समारंभात सिद्धार्थला ही पदवी प्रदान करण्यात आली. त्याचा सोलापूर ते अमेरिका असा प्रवास प्रेरणादायी आहे.

​सिद्धार्थने आधी एका आयटी कंपनीमध्ये सॉफ्टवेअर इंजिनीअर म्हणून दोन वर्षे काम केले होते. नोकरी करत असतानाच जागतिक पातळीवर उच्च शिक्षण घेण्याचे त्याचे स्वप्न होते. यासाठी त्याने अत्यंत आव्हानात्मक अशा मास्टर ऑफ कम्प्युटर सायन्स या अभ्यासक्रमासाठी प्रवेश मिळवला आणि नुकताच हा दोन वर्षांचा कोर्स उत्कृष्ट गुणांसह पूर्ण केला.

ग्रामीण पार्श्वभूमी असलेल्या सिद्धार्थने आंतरराष्ट्रीय पातळीवर यश मिळवून सोलापूर जिल्ह्याचे नाव उज्ज्वल केले आहे. त्याच्या या देदीप्यमान यशाबद्दल सर्व स्तरातून कौतुकाचा वर्षाव होत आहे. सिद्धार्थच्या या यशामुळे ग्रामीण भागातील इतर विद्यार्थ्यांनाही मोठी प्रेरणा मिळणार आहे.